Министр нақты жауап берді
Мәдениет және ақпарат министрі Аида Балаева бүгін Мәжілістің отырысынан кейін соңғы жылдары елдегі берілетін орден-медальдің көптігіне, Әли Оқаповтың әрекетіне байланысты пікір білдірді, деп хабарлайды Qaz365.kz.
Ол еңбек бағалану керектігін, орден-медальдің тым көп беріліп жатқанына келіспейтінін айтып қалды. Көп жағдайда марапатқа азаматтарды қоғамдық ұйымдар өздері ұсынатынын жеткізді.
«Биыл негізінен марапаттың көбісін «Еңбек адамдары» алды. Зауытта, шахталарда істейтін қызметкерлерге берілді. Неге біз олардың еңбегін көрсетпеуіміз керек? Бәрін жоққа шығара беру жақсы тенденция емес», – деді Аида Балаева.
Ол мұндай марапаттарды тарата беру азаматтарды алдарқату емес деп отыр.
«Мұның бәрі еңбекті бағалау деп білемін», – деді министр.
Тілшілердің бірі дамыған елдерде Қазақстан секілді орден-медальді оңды-солды тарата беремейтінін алға тартқан. Аида Балаева журналистің өзінен статистика сұрады.
Жақында Халық әртісі Роза Рымбаеваның музыкант ұлы Әли Оқапов желідегі хейттен кейін барлық алған марапаттарын қайтарып беремін деген. Осыған қатысты ведомство басшысы да пікір білдірді.
«Әли Оқапов видеоүндеу жасағаннан кейін министр ретінде өзімен сөйлестім. Шығармашылық адамы болған соң, оның үстіне жан-жақтан талағаннан кейін шыдай алмай кеткен. «Менің еңбегім емес, анаммен бағалап жатқанына шыдамадым» деді. Қазір ондай мәселе жоқ, барлығы дұрыс. Қазір сабасына түсті. Алған «Құрмет» ордені өзінде қалады», – деді министр.