Оның 91 білім алушы оқу ақысын төлемеген. Қалған 259 студент сабаққа мүлдем қатыспаған
Ақтөбеде бір сәтте 350 студент оқудан шығарылды. Қазақ-орыс халықаралық университеттің бұл шешімімен ата-аналар келіспейді, деп хабарлайды Qaz365.kz тілшісі Информбюроға сілтеме жасап.
Ақтөбелік ата-аналар диплом алмаған ұл-қыздарының болашағына алаңдайды. Айтуларынша, білім ордасының басшылығы аталған хабарламаны кеш жіберген. Енді көпшілік оқу жылы аяқталар шақта қайда барарын білмей отыр. Ата-аналар университет алдында жиналып, шу шығарды. Олар бір-ақ сәтте 350 студентті оқудан шығарып жіберу ақылға қонымсыз деп есептейді. Білім ордасының шешіміне қарсы шыққан жандардың шағымы көп.
“Әне кел, ертең кел, міндетті түрде хабарын берем деді. Бір жеті созды. Себебі бала сабаққа келген жоқ. Балам келмеді емес, келеді. Бұлар мұғалімдер өздері сабаққа келмей-ақ қойыңдар деді. Мысалы сессияларын жауып отыр ғой. Сабаққа келмесе қалай жауып отыр”, – дейді Ақтөбе қаласының тұрғыныДинара Бекмурзина.
Қазақ-Орыс халықаралық университетінің студенттері «мұғалімдердің өздері де білім беруге құлықсыз» дейді. Өйткені көп жағдайда аудиторияда бос отырып қайтады екен. Ал қара тізімге іліккендердің қатарында қашықтан білім алатындар да бар.
“Сабаққа келмеген деген себеппен оқудан шығарып отыр. Негізі менде дистанционный обучение платформасымен сабағымды жауып, солай келмеймін. Онлайн үйде отырып, оқып отырған адаммын. Оқу ақшасы бәрі төленіп тұр. Бірақ оқудан шығарып жіберді. Заңсыз. Енді талабым екінші курсты аяқтатқызып, басқа универге ауыстыруын сұраймын”, – деп отыр студент Құралай Құрман.
Бұл жекеменшік университетте студенттер 17 мамандық бойынша білім алады. Жылдық оқу ақысы 500 мың теңгеден асады. Ал ата-аналар мен студенттердің алдына шыққан оқу орнының өкілі бұл жайт туралы кураторлар ескерту берді деп отыр.
“Қазіргі таңда университетте 350 білім алушы оқудан шығарылды. Оның 91 білім алушы оқу ақысын төлемеген. Қалған 259 студент сабаққа мүлдем қатыспаған студенттер. Ректордың бұйрығымен. Міндетті түрде дистанционный дегенде университетпен байланыс болуы керек. Келіп көрінуі керек. Ол студенттер университетпен байланыста болмаған”, – дейді қазақ-орыс халықаралық университетінің бөлім басшысы Ақнұр Қадырбек.
Ата-аналар мен студенттердің жанайқайын тыңдау үшін шенеуніктер де келді. Олар Ғылым және жоғары білім министрлігіне арнайы хат жолдап, көмектесуге уәде берді.