Министр Мәжіліс депутатының сауалына жауап берді.
Қазақстанда мұғалімдер мен мектеп директорлары нейрожелілермен жұмыс істеуді үйреніп жатыр, деп хабарлайды qaz365.kz.
Оқу-ағарту министрі Ғани Бейсембаев Мәжіліс депутаты Асхат Аймағамбетовтің мектеп бағдарламасына жасанды интеллектті қолдануға арналған сабақ енгізу жөніндегі ұсынысына қатысты пікір білдірді.
Асхат Аймағамбетов депутаттық сауалында ChatGPT және DeepSeek сияқты нейрожелілер пайда болғанына екі жылдан астам уақыт өткенімен, Қазақстан мектептерінде жасанды интеллектпен жүйелі түрде жұмыс істеуді үйрету әлі енгізілмегенін атап өтті.
Алайда Ғани Бейсембаев бұл сынмен келіспейтінін алға тартты. Оның сөзінше, министрлік жасанды интеллектті білім беру процесіне бірнеше жыл бұрын енгізген. Атап айтқанда, педагогтар мен мектеп директорларына ЖИ-ді қолданудың негізгі әдістері бойынша арнайы оқыту жұмыстары жүргізілуде.