Енді мектептерде бақылауды алдын-ала хабарлау болмайды
Мәжіліс депутаты Асхат Аймағамбетов мектептерге жүргізілетін тексерулердің жазалау емес, нақты бақылау мақсатында жүргізілуі керек екенін айтып, бұл бағытта жүйеде маңызды өзгеріс болатынын жеткізді, деп хабарлайды Qaz365.kz.
Депутаттың айтуынша, қазіргі жүйе жылдар бойы формалдылыққа айналып кеткен: мектепке немесе балабақшаға санитариялық-эпидемиологиялық қызмет келгенде не болатыны, асхана жабыла ма, директорға айыппұл салына ма, қауіпсіздік шаралары қалай жүргізіледі деген сұрақтар ата-аналарды, мұғалімдерді және тіпті кәсіпкерлерді де алаңдатады.
«Бірақ біз бұл жүйені өзгертеміз. Қарағандыда санитариялық-эпидемиологиялық бақылау департаментінің қызметкерлерімен кездестік, заңға енгізілетін өзгерістерді талқыладық», – деді Аймағамбетов.
Қандай мәселелер бар?
Депутат атап өткендей, бұрынғы жүйеде бірнеше проблема байқалған:
Тексерістер алдын ала хабарланады;
Қызметкерлер барлық рұқсат қағаздарын өздерімен алып жүруі тиіс;
Айыппұлдар директорларға салынады, тіпті бұзушылыққа қатысы болмаса да;
Шынайы бақылау жүргізу мүмкін болмаған.
Не өзгереді?
Енді бақылау жаңа, “күтпеген” форматқа ауысады:
Алдын-ала хабарлау болмайды;
Алғашқы тексерулерде айыппұл салынбайды – алдымен ескерту, кеңес, ұсыныс беріледі;
Жоспарлы тексерістер оқу жылы алдында ғана жүргізіледі;
Қаржылық шығын тудыратын бұзушылықтар үшін директор емес, әкімдік жауапты болады;
Балалар өміріне қауіп төнген жағдайда жедел шаралар қолданылады: уақытша жабу, қызметкерді шеттету;
Мектеп асханалары жеткізушілерінің арнайы тізілімі енгізіліп, адал емес жеткізушілерге тосқауыл қойылады.
«Балалардың қауіпсіздігі – тек ата-ананың ғана емес, бүкіл қоғамның жауапкершілігі. Санэпидбақылау – бұл жай тексеру емес, балаларымызды қорғаудың маңызды құралы», – дейді депутат.