Алматы журналистері Satbayev University зертханаларында бір күн өткізді

Qaz365.kz редакциясы

Зертханаларда қазіргі уақытта 25 инженерлік жоба іске асырылып жатыр

 

Фото: Satbayev University

Satbayev University Алматы қаласының жетекші бұқаралық ақпарат құралдары үшін ғылыми инфрақұрылымымен таныстыратын баспасөз турын ұйымдастырды. Іс-шара аясында журналистер университеттің жаңа зертханаларын аралап, онда іске асып жатқан ғылыми жобалардың барысымен танысты, деп хабарлайды Qaz365.kz.

Қатысушылар жасанды интеллект, пайдалы қазбаларды барлау мен өндіруге арналған цифрлық технологиялар, энергетика және машина жасау бағыттарындағы студенттік және ғылыми жобалармен танысып, олардың жүзеге асырылу барысын көзбен көрді. Ерекше назар аударылған нысандардың қатарында жуырда ашылған Инжиниринг орталығы (тау-металлургия саласы бойынша) және Stroytech технопаркі болды. Аталған зертханаларда қазіргі уақытта 25 инженерлік жоба іске асырылып жатыр. Университет алдағы жылдары бұл көрсеткішті екі есеге арттыруды жоспарлап отыр.

Университетте жастардың ғылыми белсенділігі артып келеді: қазіргі таңда ғылыми жобалар жетекшілерінің 35%-ын жас зерттеушілер құрайды. Жалпы Satbayev University-де 200-ден астам ғылыми жоба жүзеге асырылуда. Бұл жобалардың бір бөлігі мемлекеттік гранттармен қаржыландырылса, екінші бөлігі жеке инвестициялар есебінен іске асырылып жатыр. Мұндай әртараптандырылған қаржыландыру моделі университеттің қолданбалы ғылымға басымдық беруіне мүмкіндік береді.

«Негізгі іргелі зерттеулермен қатар біз үшін қолданбалы ғылымды дамыту да аса маңызды. Көпжылдық дәстүрге сүйене отырып, Satbayev University қазіргі заманғы білім мен технологияларды пайдалана отырып, экономиканың және қоғамның өзекті мәселелерін шеше алатын жаңа буын инженерлері мен ғалымдарын даярлауда», – деді университет ректоры Мейрам Бегентаев.

Сапар барысында журналистер электр жетектерін предиктивті қызмет көрсету технологиялары зертханасына да барды. Онда студенттер цифрлық егіздер, датчиктер және деректерді талдау жүйелері арқылы жабдықтардың ақауларын алдын ала болжау әдістерін меңгеріп жатыр.

Бұл баспасөз туры Satbayev University-де жүргізіліп жатқан ғылыми жұмыстардың ашықтығы мен қолжетімділігін көрсетіп, журналистерге заманауи инженерлік шешімдердің қалай туындайтынын өз көздерімен көруге мүмкіндік берді.