Атырау облысындағы мектептер цифрлық білім беру жүйесіне кең көлемде көшіп жатыр. Өңірде 191 мектептің мұғалімі мен 50 мектептің оқушысы еліміздегі жетекші білім беру платформаларының бірі – AmanSultan жүйесіне қосылды, деп хабарлайды Qaz365.kz.
Платформа мазмұны әртүрлі пәндерді қамтитын кең ауқымды білім ресурсымен толықтырылған. Онда орта мектеп деңгейіне арналған 2000-нан астам анимациялық бейнеролик, 1500-ден жоғары интерактивті сабақ, физика, химия және биология пәндеріне арналған 50-ден аса жаттығу құралы бар. Бұған қоса, оқушылар үшін 30 мыңнан астам интерактивті тапсырма және 5–11-сыныптарға арналған функционалдық сауаттылық тренажёрі қолжетімді.
Облыстық Білім беру басқармасының бөлім басшысы Айнагүл Жұмағазиева AmanSultan платформасының бірқатар бірегей мүмкіндіктерін атап өтті.
«Платформада ҚР Оқу-ағарту министрлігі сарапшылары әзірлеген 4 және 9-сыныптарға арналған МОДО тренажёры бар. “МОДО–2025” әдістемесіне сәйкес 460 арнайы тапсырма дайындалған. Бұл – Қазақстанда алғаш рет әзірленген дайындық модулі және тек AmanSultan платформасында қолжетімді. Сондай-ақ мұғалімдер үшін аттестацияға жарамды біліктілік арттыру курстары енгізілген», – деді ол.
Қазіргі уақытта жүйеде 7 мыңнан астам педагог және 90 мыңға жуық оқушы тіркеліп, платформаны күн сайын белсенді пайдаланып келеді.