Сонымен қатар педагогтер де қомақты қолдауға ие болады.
Қазақстан халықаралық ғылыми жобалар байқауларында жүлделі орын алған оқушылар мен оларды дайындаған педагогтерге бір реттік төлемдер жүйесі енгізілуде. Бұл туралы Оқу-ағарту министрі Жұлдыз Сүлейменова мәлімдеді, деп хабарлайды Qaz365.kz.
Министрдің айтуынша, бұл бастама президент Қасым-Жомарт Токаевтың тапсырмасы аясында жүзеге асырылып отыр.
«Биыл мемлекет басшысы халықаралық ғылыми жобалар байқауларында І, ІІ және ІІІ орын алған оқушыларға, сондай-ақ оларды дайындаған педагогтерге бір реттік сыйақы тағайындауды тапсырған болатын», – деді министр.
Өткен аптада осы тапсырманы іске асыру мақсатында тиісті бұйрық бекітілген.
Енді жүлделі орын алған оқушылар 2 миллионнан 6 миллион теңгеге дейін бір реттік сыйақы алады.
«Биылдан бастап халықаралық ғылыми жобалар байқауларында І, ІІ, ІІІ орын алған оқушыларымыз 2 миллионнан 6 миллион теңгеге дейін бір реттік сыйақымен марапатталады», – деп нақтылады Сүлейменова.
Сонымен қатар педагогтер де қомақты қолдауға ие болады.
«Жеңімпаздарды дайындаған білікті ұстаздарға да өздерінің базалық айлығына байланысты 18,5 есе және 8,5 есе көлемінде бір реттік сыйақы беріледі», – деп қосты министр.
Министрлік бұл бастама дарынды оқушыларды қолдауға және педагог мамандығының мәртебесін арттыруға бағытталғанын атап өтті.
«Бұл – білім мен еңбекті әділ бағалаудың жарқын көрінісі. Сонымен қатар дарынды оқушылар мен оларды дайындайтын педагогтерді мемлекеттік қолдаудың маңызды қадамы», – деді ол.