"Өркен" гранттарының 10 пайызы ауыл оқушыларына беріледі
Оқу-ағарту министрлігінің түсіндіруінше, бұл өзгеріс Назарбаев зияткерлік мектептерінің 7-сыныптарында оқуға грант тағайындау бойынша ата-аналар қауымдастығынан түскен өтініштерді орындау мақсатында енгізіліп отыр.
Өзгертулер бойынша әр жылға бөлінетін грант санын жариялау мерзімі де енді нақты болады. Жобаға сәйкес, тізім әр жылдың ақпан айынан кешіктірілмей жарияланады.
Сондай-ақ, енді "Өркен" грантының емтиханын тапсырған үміткерлер мен олардың ата-аналары конкурс қорытындысын "Назарбаев Зияткерлік мектептері" ДББҰ ресми интернет-ресурсы арқылы білетін болады. Мұнда үміткердің жинаған балл саны және грант алғаны не алмағаны, болмаса резервке өткені туралы ақпарат жазылады.