Қазақстанда АИ-92 маркалы бензинінің бағасы мемлекеттік реттеу аяқталғаннан кейін литріне 300 теңгеге дейін жетуі мүмкін. Мұндай болжамды мұнай-газ саласының сарапшысы Асқар Исмаилов айтты, деп хабарлайды Qaz365.kz.
Маманның пікірінше, 300 теңгелік көрсеткіш халық үшін «психологиялық шек» болып табылады. Одан жоғары кез келген баға тұрғындар мен шағын бизнеске айтарлықтай салмақ салады.
«Бензин Қазақстанда жай ғана тауар емес. Бұл іс жүзінде бүкіл экономика үшін: тасымал, ауыл шаруашылығы, сауда және құрылыс салаларындағы кіріс бағасы. Сондықтан отын бағасының өсуі бүкіл экономикаға тез таралады», – деп атап өтті Асқар Исмаилов.
Асқар Исмаилов әлемдік нарықтағы мұнай бағасының құбылмалы екенін де атап өтті. Котировкалар барреліне 100 доллардан асып, кейін қайта төмендеуде. Алайда Қазақстан үшін басты қауіп мұнайдың әлемдік бағасы емес, әскери шиеленістер аясындағы логистикалық қиындықтар болып отыр. Жеткізу тізбегіндегі іркілістер ел бюджетіне келетін табысты азайтуы мүмкін.
«Тіпті мұнай бағасы уақытша барреліне 200 долларға дейін көтерілсе де, мұндай деңгей ұзақ сақталмайды, өйткені әлемдік экономика мұндай жоғары бағаға шыдас бере алмайды. Біз үшін басты тәуекел – баға емес, логистикадағы іркілістер», – дейді сарапшы.
Айта кетсек, Қазақстанда АИ-92 бензині мен дизель отынының бағасын өсіруге қойылған мораторий наурыз айының соңына дейін әрекет етеді. Осы мерзім аяқталғаннан кейін жанармай нарығындағы бағаның еркін айналымға жіберілуі немесе шекті бағаның қайта қаралуы күтілуде.