Қазақстан билігі Семей, Өскемен және Көкшетау қалаларында үш жаңа жылу электр орталығын (ЖЭО) Ресеймен бірлесіп салу жоспарынан түпкілікті бас тартты. «Самұрық-Энерго» АҚ басқарма төрағасы Қайрат Мақсұтовтың мәлімдеуінше, Семей мен Өскемендегі нысандардың құрылысымен қазақстандық-сингапурлық консорциум айналысады. Тиісті EPC-келісімшарттар 2026 жылдың 30 қаңтарында жасалған, деп хабарлайды Qaz365.kz.
Жаңа жоспар бойынша, сәуір айында инженерлік-геологиялық ізденістер басталып, мамырда негізгі жабдықтарға тапсырыс беріледі. Семей мен Өскемендегі станцияларды пайдалануға беру 2029 жылдың төртінші тоқсанына жоспарланған. Ал Көкшетау қаласындағы ЖЭО құрылысын Қазақстан өз бетінше, «Самұрық-Энерго» ресурстары есебінен жүргізуде. Бұл нысанның қуаттылығын 520-дан 820 гигакалорияға дейін арттыру туралы шешім қабылданып, іске қосу мерзімі 2029 жылдың бірінші тоқсанына белгіленді.
Энергетика вице-министрі Сұңғат Есімхановтың түсіндіруінше, бұл жобалар тікелей бюджеттік қаржыландырусыз жүзеге асырылады. Инвесторлар мен компаниялар қаражатты өздері тартып, нысандар іске қосылғаннан кейін ғана мемлекеттен несиелерді қайтару үшін төлемдер ала бастайды. Болжамды есеп бойынша, Көкшетаудағы ЖЭО құны 350 млрд теңгені, ал Семей мен Өскемендегі станциялардың әрқайсысы шамамен 400 млрд теңгені құрайды.
Еске сала кетсек, 2024 жылы Қазақстан мен Ресей үш көмір ЖЭО-сын салу туралы келісімге қол қойған болатын. Алайда кейінірек ресейлік тарапта қаржыландыру мәселелері туындап, жобаның кешігуіне байланысты Президент Қасым-Жомарт Тоқаев Үкімет пен «Самұрық-Қазына» қорын сынға алған еді. Нәтижесінде, стратегиялық нысандарды салу үшін жаңа серіктестер тартылып, мердігерлер құрамы өзгертілді.