Тау жынысы табиғи газ жарылуынан құлаған
Құтқарушылар үйінді астында қалған барлық жеті жұмысшының мәйітін тапты, деп хабарлайды Qaz365.kz.
Бұл туралы ҚР Төтенше жағдайлар министрлігі мәлімдеді.
«Барлық жеті жұмысшының денелері жер бетіне шығарылып, сот-медициналық сараптама жүргізу үшін полиция қызметкерлеріне тапсырылды», — делінген Төтенше жағдай министрлігінің хабарламасында.
Оқиғаның мән-жайы анықталды. Тау жынысы табиғи газ жарылғандықтан опырылып түскен. Компания өкілдерді мұндай жайт бұрын-соңды болмаған деп отыр.
«Қазақмыс» келісімшартқа сәйкес қаза болған қызметкерлердің отбасыларына жылдық табысының 10 еселенген мөлшері мен жерлеу рәсіміне 2 млн теңге берілетінін хабарлады.
Сондай-ақ тағы қарастырылып жатқан көмектер:
- асыраушысынан айырылу бойынша ай сайынғы төлемдер,
- балаларды оқытуға ақы төлеу,
- қайтыс болған қызметкерлердің несиелері мен қарыздарын өтеу,
- отбасы мүшелерінің өтініші бойынша көмектің өзге де түрлерін қарастыру.
Кеше түнде премьер-министр Олжас Бектеновтың тапсырмасымен арнайы комиссия құрылған. Оған вице-премьер Қанат Бозымбаев жетекшілік етеді.