Талдықорғанда Шерзат Болаттың өліміне қатысты сот процесі түскі үзілістен соң жалғасын тапты. Прокурор Дана Сәрсенбай тергеу кезінде Шерзат Болаттың денесін тексеру кезінде қандай жарақаттар анықталғанын айтты, деп хабарлайды Qaz365.kz.
4 қазанда Шерзат Болаттың мәйіті Алматы облысы, Талғар қаласы, Талғар аудандық орталық ауруханасынан табылған. Ол көк зембілде арқасымен жатқан. Бойы 170-175 см. Аяқ-қолы дене бойымен тік созылып жатқан. Оң жақ бетінде қызыл-қоңыр түсті қан дақтары және көгерген іздер бар. Мәйіттің үстінгі ернінде қызыл-қоңыр түсті қан дақтары бар. Сол қолының бесінші саусағында 1 см жарақат бар. Мәйіттің оң қолының білек тұсында 2 см жарақат орны бар. Мәйіттің арқасының сол жақ қабырға тұсында 2-2,5 см өткір затпен кесілген, сұғылмалы-кесілмелі жарақат орны бар. Мәйітті тексерген кезде басқа да көзге көрінетін дене жарақаттары анықталмады, - дейді Дана Сәрсенбай.