Облыс аумағында қатты дауылдан 77 нысан бүлінген
19 маусым кешке Павлодар облысына соққан күшті дауыл адам өліміне, ондаған адамның жарақат алуына және бірқатар нысандардың зақымдануына әкелді, деп хабарлайды Qaz365.kz.
Облыс әкімдігінің баспасөз қызметінің мәліметінше, желдің екпіні секундына 43 метрге дейін жеткен.
Ресми ақпарат бойынша, табиғи апат салдарынан:
16 адам жарақат алған, оның ішінде 3 бала бар;
Ақсу қаласында 1968 жылы туған әйел қайтыс болған.
Инфрақұрылымға келген залал ауқымды:
Павлодарда 47 ғимараттың шатырын жел ұшырып кеткен, оның ішінде 6 әлеуметтік нысан бар;
Ақсу мен Екібастұзда 23 нысан зақымданған;
Баянауыл ауданында 7 нысан бүлінген;
Қираулар Май және Павлодар аудандарында да тіркелген.
Дауыл салдарынан кең көлемді электр жарығының үзілуі орын алды. Жарықсыз қалғандардың қатарында Ақсу және Баянауыл ауданының тұрғындары бар.
Қазіргі уақытта қалпына келтіру жұмыстары жүргізілуде:
Байланыс және электр желілерінің 16 тірегі қалпына келтіріліп жатыр;
300-ден астам маман мен 103 техника жұмылдырылған;
Барлық төтенше жағдайлар қызметі күшейтілген режимде жұмыс істеуде.
Жергілікті билік тұрғындарды сақ болуға және ауа райы қалыпқа келгенге дейін көшеге шықпауға шақырды.