Айыпталушы Қылмыстық кодекстің 105-бабы бойынша сотталған
Шымкентте жеті баланың анасын жұмбақ жағдайда қаза тапқанына қатысты іс бойынша үкім шығарылды, деп хабарлайды Qaz365.kz тілшісі informburo.kz-ке сілтеме жасап.
Бұл іс бойынша айыпталуы қаза болған әйелдің бұрынғы күйеуі. Оған "өзін-өзі өлтіруге итермелеу" бабы бойынша айып тағылған.
Бес айға созылған тергеу нәтижесінде ер адамның кінәсі толық дәлелденбеді. Айыпталушы әйелі несие алғаны үшін оны ұрғанын мойындады. Оның айтуынша, бұл жанжал өзге бөлмеде болған, ал артынша әйелі терезеден секіріп кеткен.
— Айыпталушы Қылмыстық кодекстің 105-бабы — "Өзін-өзі өлтіруге дейін жеткізу" бойынша кінәлі деп танылып, 1 жыл 6 айға бас бостандығынан айырылды. Сот айыптау шегінен шыға алмайды. Біз бұл істі тек осы бап бойынша қарастырдық. Іс материалдары да осы бап аясында зерттелді, — деді судья Сабит Тореханов.
Марқұмның төрт жасар баласының анасының зорлық көргенін айтқан куәлігі жасына байланысты ескерілмеген.
Қаза болған әйелдің балалары үкіммен келіспейді. Олар жазаның тым жеңіл екенін айтып, істі қайта қарауды талап етіп отыр.
— Ол жазасыз қалмауы керек. Анамыздың денесінде көптеген жарақат болды. Адвокатымыз істі қайта қарап, Қылмыстық кодекстің 99-бабы — "Адам өлтіру" бойынша қайта саралауға кеңес берді. Қазірдің өзінде отбасылық зорлық-зомбылық үшін 8 жылға дейін бас бостандығынан айыру жазасы қарастырылған. Ал бұл жерде адам өлді, ал ол бар болғаны 1,5 жыл ғана алды. Біз, жеті бала, анасыз қалдық. Бір ініміз әлі күнге дейін балалар үйінде. Біз оны қайтарып алу үшін күресіп жүрміз. Анамызды өлтіргені үшін әкеміздің жеңіл жаза алғанын қабылдау өте ауыр, — деді жәбірленуші Перизат Қалдарбек.