24 қараша кешке Алматы–Бішкек тас жолының 65-шақырымында болған ірі жол апаты салдарынан алты адам көз жұмды, деп хабарлайды Qaz365.kz.
Алматы облыстық полиция департаментінің алдын ала ақпаратына сәйкес, 23 жастағы Audi көлігінің жүргізушісі рөлге ие бола алмай, қарсы бағыттағы Toyota көлігімен соқтығысқан.
«Апат кезінде екі жүргізуші мен үш жолаушы оқиға орнында қаза болды. Тағы бір жолаушы ауруханаға жеткізілгенімен, дәрігерлердің барлық әрекетіне қарамастан, алған жарақатынан көз жұмды. Сонымен қатар бес адам түрлі жарақат алып, қазіргі уақытта дәрігерлердің бақылауында», – делінген облыстық полицияның хабарламасында.
Ішкі істер министрлігінің дерегінше, Қазақстанда жыл сайын орта есеппен 2,5 мың адам жол апатынан қаза табады. Соңғы жылдары бұл көрсеткіш баяу болса да өсіп келеді.