Шымкент қаласында жол-көлік оқиғасынан соң туындаған төбелесте жарақат алған азаматтың денсаулығы жайлы қалалық денсаулық сақтау басқармасы ақпарат таратты, деп хабарлайды Qaz365.kz тілшісі Kazinform-ға сілтеме жасап.
Оқиға 20 қаңтар күні тіркелген. Жол апатынан кейін көлік жүргізушілері мен жолаушылар арасында келіспеушілік туындап, жанжал төбелеске ұласқан. Қақтығыс барысында бірнеше адам пышақ жарақатын алған. Ауыр жарақат алғандардың бірі оқиға орнында көз жұмды.
Тағы бір қатысушы – 36 жастағы ер адам аса ауыр хәлде Шымкент қалалық №1 клиникалық ауруханасына жеткізілген. Дәрігерлер оның сол жақ кеуде тұсынан өтіп кеткен пышақ жарақатын анықтаған.
Медицина қызметкерлерінің мәліметінше, науқасқа жедел түрде операция жасалған. Қазіргі уақытта оның жағдайы ауыр күйінде қалып отыр, ол жансақтау бөлімінде ем қабылдауда.
Аталған оқиғаға байланысты кісі өлтіру дерегі бойынша қылмыстық іс қозғалып, тиісті тергеу жұмыстары жүргізіліп жатыр.