Маңғыстау облысындағы «Бейнеу» полигонында жоспарлы далалық атыс жаттығулары кезінде мерзімді қызметтегі сарбаз оқ жарақатынан көз жұмды. Құрлық әскерлерінің баспасөз қызметі қайғылы оқиғаның қарумен жұмыс істеу кезінде орын алғанын мәлімдеді, деп хабарлайды Qaz365.kz
Қаза тапқан сарбаз Құрлық әскерлерінің «Батыс» өңірлік қолбасшылығына қарасты бөлімде қызмет еткен. Қазіргі уақытта Батыс өңірінің әскери-тергеу органдары қылмыстық іс қозғады. Оқиғаның барлық мән-жайы мен себептері анықталуда. Бас прокуратура іске арнайы процессуалдық прокурор тағайындады.
Оқиға орнына шұғыл түрде Қорғаныс министрінің орынбасары, Бас әскери прокурор және ІІМ Әскери-тергеу департаментінің бастығы ұшып кетті. Бас прокуратура тергеу барысының ерекше бақылауға алынғанын мәлімдеді. Барлық қажетті сараптамалар тағайындалып, жедел-тергеу шаралары жүргізіліп жатыр.
Бұл оқиға қоғамда әскердегі қауіпсіздік мәселесін қайтадан күн тәртібіне шығарды. Соңғы уақытта әскери бөлімдердегі жазатайым оқиғалар мен сарбаздардың өлімі жиілеп кеткені азаматтар мен құқық қорғаушылардың алаңдаушылығын тудырып отыр.