Бұл мәселе 2023 жылғы 17 шілде дүйсенбі күні министрлікте қарастырылды
13 шілде күні түнде "Қазақмыс Энерджи" ЖШС-ның Жезқазған ЖЭО-да апаттық жағдай орын алды, деп хабарлайды Qaz365.kz.
Бұл жөнінде ҚР Энергетика министрлігінің баспасөз қызметі мәлімдеді.
"Кеше, 2023 жылғы 13 шілдеде, сағат 21:12-де қолайсыз ауа райы жағдайында Ақадыр – Жезқазған 500 кВ электр беру желісі ажыратылды. Электр желісінің параметрлерінің өзгеруі Жезқазған ЖЭО-ның №7 және 11 қазандықтарының шаң қоректендіргіш қозғалтқыштарындағы жиілік түрлендіргіштерінің ажыратылуынан олардың сөнуіне әкелді. Будың болмауына байланысты №4, 7 турбиналар тоқтатылды, бұл генерацияның толық төмендеуіне әкелді", – деп мәлімдеді ҚР Энергетика министрлігінің баспасөз қызметі.
Станцияның жұмыс режимін қалпына келтіру бір сағаттан кейін, сағат 22:20-да басталды.
"Технологиялық бұзушылық фактісі бойынша жан-жақты тергеу жүргізу мақсатында Атомдық және энергетикалық қадағалау мен бақылау комитетінің комиссиясы құрылды", – делінген ҚР Энергетика министрлігінің баспасөз қызметінің хабарламасында.
Ведомство Жезқазған ЖЭО бірінші рет толық тоқтатылмағанын атап өтті. 19 маусым сағат 12:45-те өзінің электр қажеттіліктерін жоғалту салдарынан станция генерациясы 129-дан 0 МВт-қа дейін төмендеген.
"Жоғарыда айтылғандардың негізінде "Қазақмыс Энерджи" ЖШС-ның басшылығына Жезқазған ЖЭО-ның сенімді жұмысын қамтамасыз ету жөнінде пәрменді шаралар қабылдау тапсырылды", – деп жазылған ҚР Энергетика министрлігінің баспасөз қызметінің мәлімдемесінде.
"Қазақмыс Энерджи" ЖШС-ның қауіпсіз жұмыс мәселесі бойынша арнайы кеңес 2023 жылғы 17 шілде дүйсенбі күні министрлікте өткізіледі.