Өртті жоюға 30 адам мен 8 техника жұмылдырылды
Алматыда түнде Modi Restoranchik мейрамханасының шатыры өртенді, деп хабарлайды Qaz365.kz.
Оның видеосы әлеуметтік желіде тарады. Алматы қаласы Төтенше жағдайлар департаментінің хабарлауынша, электр сымдарының қысқа тұйықталуы салдарынан өрт сөндірушілерге ток соғу қаупі төнген.
«Жоғары дәрежедегі шақыртумен жіберілген өрт сөндірушілер оқиға орнына 5 минутта жетті. Алайда өрт сөндірушілерге қауіп туындады – 380 вольтты электр желісінің ток көздері ашық болған. Жеке құрамның арасында қайғылы оқиғаларды болдырмау мақсатында, жедел келген авариялық энергетика қызмет бригадасы нысанды ток көзінен ажыратып тастағанша күтуіне тура келді», – деп хабарлады департаменттен.
Қызыл жалын «Modi Restoranchik» мейрамханасы шатырының 95 шаршы метрін шарпыды.
Қабылданған шара бойынша мейрамхана қызметкерлері үшін жақын орналасқан тұрмыстық үй-жайлар өрттен қорғалды.
Өртті жоюға 30 адам мен 8 техника жұмылдырылды.
Төтенше жағдайлар департаменті өрт сөндірушілердің қызыл жалынды қалай сөндіргенін де көрсетті.