Ол судьядан бұрын сотты болмағанын ескеруді өтінді
Алматыда үш адамның өліміне себеп болған автобус апатына қатысты сот отырысы өтіп жатыр. Бүгін айыпталушының сөз берілді, деп хабарлайды Qaz365.kz.
Оның сөзінше, оны мұндай әрекетке жүргізуші арандатқан, соның салдарынан жол-көлік оқиғасы болған.
«Жүргізуші мені барлық адамның көзінше балағаттап, мені көліктен шығармай қойды. Бұл - арандату. Қазақстан Республикасы Қылмыстық кодексінің 293-бабы 1-бөлігі бойынша өз кінәмді мойындаймын. Қазақстан Республикасы Қылмыстық кодексінің 351-бабы 3-бөлігі бойынша өз кінәмді мойындамаймын, өйткені Шокебаева есінен танып қалған жоқ. Оның автобусты тоқтатуға мүмкіндігі болды», – деді айыпталушы Дархан Ахметжанов.
Ол судьядан бұрын сотты болмағанын ескеруді өтінді. Дархан Ахметжановтың айтуынша, ол нанын адал еңбекпен тапқан қарапайым құрылысшы.
«Соттан кәмелетке толмаған үш балам бар екенін және бұл менің бірінші рет құқық бұзуым екенін ескеруін сұраймын. Қазақстан Республикасы Қылмыстық кодексінің 293-бабы 1-бөлігі бойынша бас бостандығынан айырусыз жаза тағайындауды сұраймын. Қазақстан Республикасы Қылмыстық кодексінің 351-бабы 3-бөлігі бойынша мені ақтауыңызды сұраймын. Барлық зардап шеккендерден шын жүректен кешірім сұраймын», - деді Ахметжанов.
Судья айыпталушыға үкім бүгін, 26 сәуірде сағат 16.30-да жарияланатынын хабарлады.
Еске салайық, Алматыда автобус аялдамада тұрған бір топ адамды қағып кеткен еді. Салдарынан 3 адам мерт болды. Кейіннен оқиға болған сәтте жүргізушіні жолаушы ұрып талдырып тасталғаны айтылды.