Видеоға Қылмыстық-атқару жүйесі комитеті түсініктеме берді
Желіде мәжілісмен Тұрлыхановтың бас бостандығын шектеуге үкім шығарылған ұлы түнгі уақытта серуендеп жүрген видеосы тарап кетті. Видеоға Қылмыстық-атқару жүйесі комитеті түсініктеме берді, деп хабарлайды Qaz365.kz.
"Екі жылға бас бостандығын шектеуге сотталған Нұрасыл Болат басқа қалада түнгі уақытта жайбарақат серуендеп, ойын-сауық орындарындағы салтанатты іс-шараларға қатысады. Ең қызығы, ол жазасын Астанада өтеп жатыр, ал іс - шара Алматыда өткен болатын", - делінген видеодағы хабарламада.
ҚАЖК баспасөз қызметі хабарлағандай, аталған факті бойынша сотталған адамға ескерту жасалды.
"Бұл сотталған адам бас бостандығын шектеу түріндегі жазасын өтейді және Алматы қаласының пробация қызметінде есепте тұрады. Пробациялық бақылауды бұзу фактісі бойынша сотталған адамға ескерту жасалды, жазаны ауыстыру туралы мәселені шешу үшін сотқа материал дайындалуда”, – деді ҚАЖК баспасөз қызметі.