Мәжіліс депутаты Бақытжан Базарбек міндетті әлеуметтік медициналық сақтандыру (МӘМС) жүйесіндегі қаржы айналымына бақылауды күшейту қажет екенін мәлімдеді. Оның айтуынша, МӘМС-тің қаржылық бөлігіне бақылау Қаржы министрлігі құзыретіне берілуі тиіс, деп хабарлайды Qaz365.kz.
Депутаттың сөзінше, мұндай ұсыныс жүйедегі ашықтықты арттырып, қаражатты шығару схемаларына тосқауыл қою мақсатында көтеріліп отыр. Базарбек фармацевтика және медициналық бақылау саласындағы қадағалау функциялары қайта енгізілгенімен, қаржы жымқыру деректері әлі де тоқтамағанын айтты.
Ол бұған дейін денсаулық сақтау мәселелері бойынша заң жобасын қарау кезінде депутат Мұрат Әбенов екеуі бақылау функцияларын фармацевтикалық және медициналық бақылау комитетіне қайтару жөнінде түзету енгізгенін еске салды. Депутаттың айтуынша, бұл тетіктер 2015–2016 жылдарға дейін болған, алайда кейін жасанды түрде алынып тасталған.
Базарбектің айтуынша, аталған түзету Мемлекет басшысы тарапынан қолдау тауып, қазір фармацевтика және медициналық бақылау органдары қадағалауды жүзеге асырып отыр. Алайда бұл шаралар өздігінен мәселені толық шешпеген.
«Тәжірибе көрсеткендей, ұрлық фактілері тоқтаған жоқ. Сондықтан қаржылық бақылауды толықтай Қаржы министрлігі жүзеге асыруы қажет. Ал Денсаулық сақтау министрлігі қор бойынша уәкілетті орган ретінде қала береді», – деді депутат.
Ол бұл өзгеріс МӘМС қорының толықтай Қаржы министрлігінің қарамағына берілуін білдірмейтінін нақтылады. Денсаулық сақтау министрлігі салалық уәкілетті орган мәртебесін сақтайды, ал қаржы ағындары мен олардың ашықтығына бақылау Қаржы министрлігінің жауапкершілігінде болады.
Сондай-ақ депутат МӘМС қорының жеке есеп жүйесі болғанын, оның мемлекеттік қаржы қозғалысының бірыңғай жүйесімен үйлеспегенін атап өтті. Оның пікірінше, бұл да ірі көлемдегі заңбұзушылықтарға жол ашқан.
«Нәтижесінде қаражаттың ауқымды көлемде ұрланғанын көріп отырмыз. Сондықтан МӘМС аясында бірнеше қылмыстық істің қозғалуына негіз бар», – деп түйіндеді Бақытжан Базарбек.
Айта кетейік, бұған дейін де Мәжілісте МӘМС жүйесіндегі ықтимал заңбұзушылықтар мен бюджет және сақтандыру қаражатының тиімді жұмсалуына бақылауды күшейту мәселелері бірнеше рет көтерілген.