Мопед жүргізу үшін оны тіркеп, жүргізуші куәлігін алу керек
2025 жылдың 5 сәуірінен бастап мопедтер ресми түрде механикалық көліктерге теңестіріліп, тіркеуден өтпеген мопедтерді иелерінің көшеде жүргізу құқығы шектеледі, деп хабарлайды Qaz365.kz.
Бұл туралы ҚР Ішкі істер министрлігі мәлімдеді.
“5 сәуірден бастап тіркелмеген мопедтерді пайдалануға, жүргізуші куәлігінсіз жүруге тыйым салынады. Бұзушылықтарды болдырмау үшін мопедті алдын ала тіркеп, жүргізуші куәлігін алуды ұсынамыз, – деді ІІМ әкімшілік полиция комитетінің ерекше тапсырмалар жөніндегі аға инспекторы Арай Төлегенқызы.
Мопедтерді пайдалану үшін жасалатын шаралар тізбесі келесідей:
- полицияда тіркелу;
- А1, А немесе В санатындағы жүргізуші куәлігі;
- техникалық тексеру;
- азаматтық жауапкершілікті сақтандырудан өту қажет болады.
Тіркелу үшін тұрғылықты жері бойынша арнайы ХҚКО-ға келесі құжаттармен жүгіну қажет:
- жеке куәлік (электронды түрде болуы мүмкін);
- мопедтің техникалық құжаты немесе сипаттамалары.
Кейін қажетті өтінішті толтырып, мопедті тексерістен өткізіп, мемлекеттік баж төлемдерін төлеу керек.