Қаңтар оқиғасынан бері 772 қару жасырылған орын табылған
Қаңтар оқиғасындағы жаппай тәртіпсіздік кезінде 2960 табельдік және азаматтық қару ұрланған болатын. Биыл қаңтарда сол кезде ұрланған қару-жарақтың бір бөлігі Шымкент қаласы маңындағы зиратқа жасырылған, деп хабарлайды Qaz365.kz.
Бұл туралы ҚР ІІМ мәлімдеді.
"Соңғы үш жылда жедел іс-шаралардың, тінту және рейдтердің нәтижесінде 8 мыңға жуық атыс және травматикалық қару, 831 граната және түрлі калибрлі 112 мыңнан астам оқ-дәрілер табылып, тәркіленді. Сондай-ақ қару жасырылған 722 орын табылды. Бүгінгі таңда қаңтар оқиғасы кезінде ұрланған 1226 қарудың шығу тегі нақты айқындалды. Қалған тәркіленген 6765 қарудың қылмыскерлер тіркеу нөмірлерін қасақана жойып, өшіріп тастағанына байланысты қазіргі уақытта олар бойынша тиісті сараптамалар тағайындалды. Биыл қаңтар айында Шымкент қаласының шетінде зират маңынан қару жасырылған орын табылып, 4 тегіс ұңғылы мылтық пен түрлі оқ-дәрілер тәркіленді. Олардың ішінде Алматы қаласындағы қару-жарақ дүкенінен қаңтар оқиғасы кезінде ұрланған қарулар да бар. Қостанай облысында бұрын сотталған жергілікті тұрғынның жертөлесінен 3 Калашников автоматы табылып, тәркіленді. Бұл факті бойынша қылмыстық іс қозғалды", – деді департамент бастығы - ІІМ ресми өкілі Шыңғыс Алекешев.
Күдікті қазір уақытша ұстау изоляторына қамалды. - ІІМ және ҰҚК бұл жұмыстарды тұрақты негізде жалғастырып жатыр.