Әскери бөлімдерде заманауи IT-жүйелермен бейнебақылау орнатылады
Әскери бөлімдерге жасанды интеллект жүйесі бар бейнекамералар орнатылады, деп хабарлайды Qaz365.kz.
Бұл туралы ҚР Бас прокуроры Берік Асылов Х әлеуметтік желісінде мәлімдеді.
Бас әскери прокуратура Қарулы Күштермен, басқа да әскерлер мен әскери құрылымдармен бірлесіп, екі жаңа жобаны енгізеді: «Әскердегі заң және тәртіп», «Цифрлық профилактика». Мақсат – әрбір әскери қызметші қорғалған, ал командир сенім мен қолдауға ие болатын жүйені қалыптастыру.
«Ең алдымен әскери бөлімдерде заманауи IT-жүйелермен бейнебақылау орнатылады. Жасанды интеллект технологияларын енгізу арқылы жағдайды автоматты түрде талдап, жеке құрамның қауіпсіздік деңгейін арттыру көзделуде. Командирлерді (далалық жаттығуларда, атыс кезінде, оқу-жаттығуларда), қарауылдағы және жауынгерлік кезекшіліктегі мерзімді қызметтегі сарбаздарды бейнежетондармен жарақтандыру жоспарланып отыр», – деді Берік Асылов.
Оның айтуынша, http://armia.kz сайтында цифрлық кеңесші іске қосылды. Бұдан басқа да жаңа байланыс арналары енгізіліп жатқаны айтылған.