Ведомствоның мәліметінше, экологиялық нормалардың бұзылғаны анықталмаған
ҚР Экология және табиғи ресурстар министрлігі Telegram негізін қалаушы Павел Дуровтың Көлсай көлінде шомылуына байланысты пікір білдірді, деп хабарлайды Qaz365.kz.
Ведомствоның мәліметінше, экологиялық нормалардың бұзылғаны анықталмаған.
Бұған дейін Павел Дуров 7 қазан күні өз парақшасында Көлсай көлінен шыққан сәті көрсетілген бейнеролик жариялаған еді.
Министрлік ресми мәлімдемесінде сол жерде шомылуға тыйым салынғаны туралы ескерту белгілері болмағанын, сондықтан кәсіпкердің әрекеті табиғи аймаққа зиян келтірмегенін атап өтті.
«Бұл жағдай әдейі жасалмаған және өңірдің экологиялық тұрақтылығына әсер еткен жоқ», – делінген хабарламада.
Сонымен қатар министрлік ерекше қорғалатын табиғи аумақтарда жүріп-тұру ережелері туралы туристерді жүйелі түрде ақпараттандырудың маңыздылығын атап өтті. Бұл шаралар бір жағынан Қазақстанның бірегей табиғатын сақтауға, екінші жағынан экологиялық әрі жауапты туризм бағытындағы елдің тартымдылығын арттыруға сеп болмақ.
«Жарияланған бейнематериал имидждік сипатқа ие және Қазақстанның табиғи сұлулығын халықаралық аудиторияға танытты. Бұл еліміздің туристік әлеуетін ілгерілету тұрғысынан маңызды», – деп қорытындылады министрлік.