Алматы ипподромы – ел тарихындағы ең көне және мәдени маңызы зор спорт нысандарының бірі
Алматы ипподромының аумағында тұрғын үй кешені салынады деген ақпарат әлеуметтік желілер мен бірқатар БАҚ-та тарағаннан кейін, «Тенгри Инвест» ЖШС бұл мәліметті жоққа шығарды, деп хабарлайды Qaz365.kz.
Компания өкілдері ипподромда ешқандай құрылыс жұмыстары жүргізілмегенін және тұрғын үй немесе коммерциялық нысандар салу жоспары жоқ екенін мәлімдеді.
«Тарихи ипподром аумағында ешқандай құрылыс жұмыстары жүргізіліп жатқан жоқ. Ипподром бұрынғыдай жұмыс істеп тұр, мұнда ат спорты жарыстары өтіп, ұлттық спорт түрлері дамытылып келеді», – деді «Тенгри Инвест» ЖШС директоры Ержан Майлыбаев.
Алматы қаласы әкімдігі де бұл ақпараттың негізсіз екенін растады.
«Егжей-тегжейлі жоспарлау жобасына сәйкес, аталған аумақ ипподром ретінде бекітілген. Оны бұзу немесе басқа мақсатта пайдалану жөнінде ешқандай рұқсат берілмеген», – делінген әкімдіктің хабарламасында.
Алматы ипподромы – ел тарихындағы ең көне және мәдени маңызы зор спорт нысандарының бірі. Мұнда жыл сайын ұлттық спортты дәріптейтін ірі жарыстар мен қоғамдық іс-шаралар өткізіліп келеді.