КҚК әлемдік энергетикалық жүйенің тұрақтылығын сақтауда маңызды рөл атқарады
Қазақстан Республикасы Каспий құбыр консорциумына жасалған шабуылға байланысты Украинаға наразылық білдірді, деп хабарлайды Qaz365.kz.
“Қазақстан Республикасының Сыртқы істер министрлігі Новороссийск теңіз порты акваториясында халықаралық Каспий құбыр консорциумының аса маңызды инфрақұрылымына бағытталған кезекті мақсатты шабуылға байланысты наразылық білдіреді. Бұл оқиға халықаралық құқық нормаларымен қорғалатын азаматтық нысанға қарсы жасалған үшінші агрессиялық акт болып отыр”, – деді Сыртқы істер министрлігінің ресми өкілі Айбек Смадияров.
Ол Қазақстанның әлемдік энергетикалық нарықтың жауапты қатысушысы ретінде энергия ресурстарын тұрақты әрі үздіксіз жеткізуді қамтамасыз етуге ерекше мән беретінін атап өтті.
“Каспий құбыр консорциумы әлемдік энергетикалық жүйенің тұрақтылығын сақтауда айрықша орын алатынын атап өтеміз. Осы оқиғаны Қазақстан Республикасы мен Украинаның екіжақты қатынастарына залал келтіретін әрекет ретінде бағалаймыз және украин тарапы мұндай жағдайлардың қайталануына жол бермеу бойынша нақты шаралар қабылдайтынын күтеміз”, – деді СІМ өкілі.