Қазақстан Сенаты Қырғызстанмен арадағы шипажай нысандарына қатысты келісімді ратификациялады. Құжатқа сәйкес, Ыстықкөлдегі төрт бірдей демалыс орны орналасқан 58,8 гектар жер Қазақстанға 49 жылға жалға беріледі, деп хабарлайды Qaz365.kz.
Қай нысандар туралы сөз болып отыр?
Келісім аясында мына нысандардың жері берілді:
«Қазақстан» шипажайы;
«Самал» демалыс үйі;
«Университет» спорттық-сауықтыру лагері;
«Олимп» спорттық-сауықтыру орталығы.
Бішкек тарапы бұл жер телімдерінің жалға алу мерзімі аяқталғанша қайтарып алынбайтынына кепілдік берді.
Қазақстанның міндеттемелері
Келісім бойынша Қазақстан тарапы бұл нысандарды заманауи 3-4 жұлдызды деңгейге дейін жаңартып, олардың жыл бойы жұмыс істеуін қамтамасыз етуі тиіс. Модернизациялау мерзімі 2029 жылдың соңына дейін ұзартылды. Сонымен қатар:
Нысандарға инвесторлар тартуға рұқсат етілген;
Жұмысшылардың кемінде 80 пайызы Қырғызстан азаматтары болуы шарт.
Қазіргі уақытта жаңа «Қазақстан» шипажайының құрылысы басталып кетті, оны 2026 жылдың соңында пайдалануға беру жоспарлануда. Ескі ғимараттар бұзылады, алайда Дінмұхамед Қонаевтың саяжайы тарихи құндылығына байланысты сақталып, мұражайға айналдырылмақ. Қалған үш нысан бойынша жобалау жұмыстары жүріп жатыр.