Қазіргі уақытта жұмыс істеп тұрған ғимараттардың 50%-ы ХІХ-ХХ ғасырларда салынған
Қазіргі уақытта жұмыс істеп тұрған ғимараттардың 50%-ы ХІХ-ХХ ғасырларда салынған, олардың 30%-ы қолданыстағы стандарттарға сай келмейді, деп хабарлайды Qaz365.kz тілшісі.
Бұл туралы «Ашық» НҚА порталында жарияланған Қоғаммен әріптестікте қоғамдық қауіпсіздікті қамтамасыз етудің 2024-2028 жылдарға арналған тұжырымдамасында жазылған.
«Қылмысқа қарсы күрес және қоғамдық тәртіпті сақтауды қамтамасыз ету қызметінің тиімділігіне материалдық-техникалық жарақтандырудың нашар деңгейі кері әсерін тигізуде. Қазіргі уақытта жұмыс істеп тұрған ғимараттардың 50%-ы ХІХ-ХХ ғасырларда салынған, тозығы жеткен және жарамсыз күйде. Оның 30%-ы қолданыстағы стандарттарға сәйкес келмейді.
Жалпы, республика бойынша 225 полиция объектісін салу (оның ішінде 6 облыстық ішкі істер департаменті, 84 - қалалық және аудандық органдардың ғимараты), сондай-ақ барлық ғимараттарды күрделі жөндеуден өткізу қажет», - деп мәселе көтерілген тұжырымдамада.
Ведомство дерегінше, 2015 жылдан бері Ішкі істер министрлігінің республикалық және жергілікті бюджет есебінен полиция объектілерін салу жөніндегі бастамалары қолдау таппай келеді.