Ол бұл қызметті 2022 жылдың наурыз айынан бері атқарып келген
Талдықорған қаласының әкімі Әсет Масабаев қызметінен кетті, деп хабарлайды Qaz365.kz.
Мамыр айының басында Әсет Масабаев инсультпен жансақтау бөліміне түскен. Қалпына келуге бір айға жуық уақыт кетті. Ол екі апта бұрын жұмысқа қайта кірісті. Бүгін, 30 маусымда оның отставкаға кеткені белгілі болды.
Масабаев әр уақытта Алматы қаласы Медеу ауданы әкімінің орынбасары, оңтүстік астананың табиғи ресурстар және табиғатты пайдалануды реттеу басқармасының бастығы, Алматы қаласы Энергетика және коммуналдық шаруашылық басқармасы басшысының орынбасары, қалалық әкімдіктің басқарма бастығы қызметтерін атқарған.
Талдықорған қаласының жаңа әкімінің есімі бүгін сағат 15:30-да белгілі болады. Осы уақытта Жетісу өңірінің басшысы Бейбіт Исабаевтың төрағалығымен қала әкімдігінің қабырғасында актив жиыны өтеді.