Ата-аналар жаңа мектеп сұрап отыр
Риддердегі “Шаңырақ” мектеп-гимназиясының мәселесі бүгін-ертең шешіле қоймайтын секілді. Себебі жаңа қазақ мектебі бой көтеретін ғимараттың орны әлі анықталған жоқ. Орны былай тұрсын, салыну-салынбауы екіталай, деп хабарлайды Qaz365.kz.
“Шаңырақ” мектеп-гимназиясының қос ғимаратының да тозығы жеткен. Мектеп ғимаратының бірі 1937 жылы, екіншісі 1960 жылы бой көтерген. Биыл ғимаратты жөндеуге 50 млн теңге қаржы бөлініпті.
– «Шаңырақ» мектебін жөндеуге 50 млн теңге көлемінде қаржы бөлініп, мектеп ғимаратына жапсарлас тұрған апаттық жағдайдағы шағын спортзал бұзылды. Қосымша бастауыш сынып оқитын корпустың жылу жүйесін, терезелерін ауыстырдық. Спортзалының тақтай еденін алып тастап, цементпен тегістеп, тартып шықтық, – дейді аталған білім мекемесінің директоры Лаура Абраимова.
“Есекке жабу жапқанмен тұлпар болмайды” деуші ме еді?! Ата-аналар ескіні жамауды емес, жаңа мектеп сұрап отыр. Қала құрылысы және сәулет бөлімі мамандары жаңа қазақ мектебінің орны анықталғанын айтады.
– «Мичурин 1» аумағында, балабақша іргесінде 3 гектар бос жер қазақ мектебінің құрылысы үшін рәсімделіп қойды. Қазір жобалау жұмыстары жүріп жатыр. Мектеп 300 орынға лайықталған. Құрылыс 2024 жылы басталады, – деп 0ала құрылысы және сәулет бөлімінің бас маманы Наталья Долгова шегелеп айтты.
Қала әкімі Дәулет Батырбаев жаңа мектептің орны әлі де нақты шешілмегенін сөз етті. Қаланың қақ ортасына «Жайлы мектеп» бағдарламасы аясында «Самұрық Қазына» қорының қолдауымен 600 орындық мектептің құрылысы бастау алғанымен, ол да “Шаңыраққа” берілмейді. Аралас мектеп болған жағдайда да, қазақ мектебінің ата-аналары балаларын аралас мектепке бергісі жоқ.
– Міне, балам бірінші сыныпқа барады. Мектеп ғимараттары болса, апаттық жағдайда тұр. Бізге жаңа мектеп керек. Мынау заманда бір мектептің ғимараты екі жақта деген сұмдық. Дұрыс спорт залдары да жоқ. Қазақ мектебін салу керек, – дейді қала тұрғыны Әсем Кәбекова.
Алайда қазақ мектебінің оқушылары қашан жайлы мектепте оқитыны әлі белгісіз.
Еске сала кетейік, бұған дейін Риддер қаласындағы жалғыз қазақ мектебі – «Шыңырақ» көп салалы мектеп-гимназиясының құлағалы тұрғаны туралы жазған едік.