Адвокат Айман Омарова Отырарда ер адам бірнеше баланы жаппай зорлағанын мәлімдеді.
Түркістан облысы Отырар ауданында балабақша қызметкері зорлық көрсеткен бастауыш сынып оқушыларының саны 15-тен астам болуы мүмкін, деп хабарлайды Qaz365.kz.
Адвокат Айман Омарованың айтуынша, оның 14-і қыз бала, 1-уі ұл көрінеді.
«Бізге алғашында 3 қыз зорлық көрді деген ақпарат келіп жеткен болатын. Енді олардың саны 15-ке жетті деген мәлімет келді. Зорлық құрбандарының саны одан да көп болуы мүмкін. Күдіктіні ұстапты. Бұл видеоүндеуді біз Бас прокуратураға жолдап отырмыз. Барып тексерулерін сұраймыз. Себебі кей ата-ана арыз жазғысы келмей отыр екен. Өйткені істі жауып тастай ма деп қорқады», – деді адвокат тікелей эфир кезінде.
Қорғаушының мәліметінше, оқушылардың жаппай зорлануы туралы «One-Stop-Service» жобасына Түркістан облысының тұрғындары хабарласып айтқан. Олардың жасы 5-10 жас аралығында екен.
Ал заңгер Ләззат Ракишеваның айтуынша, қазіргі таңда күдіктімен көрші тұратын көптеген ата-ана кішкентай қыздарын жаппай гинекологқа тексертіп жатыр екен. Сондықтан зорлық құрбандарының саны 15-тен көп болуы мүмкін.
«Күдікті балабақшада от жағушы (кочегар) боп істейді екен. Жазда дәл осы адамның үстінен зорлық-зомбылық бойынша бір арыз жазылыпты. Бірақ неге іс қозғалмағаны белгісіз», – деді Ләззат Ракишева.