Прокуратура өкілдері бюджет қаржысының негізсіз жұмсалуына жол бермеді
Қызылорда прокуратурасы мемлекеттік сатып алу саласында заңдылықтың сақталуына талдау жүргізді. Нәтижесінде бұған дейін орташа жөндеуден өткен көшелерге тағы қаражат бөлінгені анықталды, деп хабарлайды Qaz365.kz.
Прокурорлар араласқаннан кейін мемлекеттік сатып алудың күші жойылып, 1,7 млрд теңгенің негізсіз жұмсалуына жол берілмеді.
Облыстық прокуратураның ақпаратынша, 2020 жылы Қызылорда қаласы Қызылжарма ауылдық округі Батырбаев көшесіне 49 млн теңгеге орташа жөндеу жүргізілген.
"Автомобиль жолдарының құрылымдық элементтерінің, оның ішінде салу, реконструкциялау, күрделі, орташа және ағымдағы жөндеуден кейінгі жол жағдайының жөндеуаралық мерзімдерін белгілеу жөніндегі ұсынымдар туралы" бұйрыққа сәйкес, автокөлік жолдарына күрделі жөндеуаралық мерзім 6-9 жылды құрайды.
"Осы талаптарға қарамастан, Қызылжарма ауылдық округінің әкімдігі биыл Батырбаев көшесіне күрделі жөндеу жұмыстарын жүргізуге қаражат бөліп, 653,9 млн теңгеге мемлекеттік сатып алу жариялаған. Осыған ұқсас заңбұзушылықтар Әбенов, Досхожин және Сексенбаев көшелеріне күрделі жөндеуге 1 млрд теңге қаражат бөлу кезінде анықталды", – деді прокурорлар.
Қабылданған шаралардың нәтижесінде жалпы сомасы 1,7 млрд теңгені құрайтын 4 сатып алу конкурсының күші жойылды.