Заңгер Айгүл Орынбектің айтуынша, қала прокуроры істі өз бақылауына алып, Абай ауданының прокурорына тапсырма берген
Бұл туралы заңгер Айгүл Орынбек өзінің Facebook парақшасында мәлімдеді, деп хабарлайды Qaz365.kz.
Оның айтуынша, қала прокуроры істі өз бақылауына алып, Абай ауданының прокурорына тапсырма берген.
“Шымкент қаласының прокуроры Ғабит Мұқанов 15 жасар жоғалған қыздың ісін өз бақылауына алды! Кеше қаланың прокуроры шақырып, бүкіл уәждерімізді тыңдап, істі өз бақылауына алып, Абай ауданының прокурорына тапсырма берді. Бүгін Абай ауданының прокуроры Роман Беркович бізді қабылдап, іске қатысты бүкіл заңсыз жасалған іс -әрекеттер тергеп-тексерілетінін айтты. Заң бәрімізге ортақ! Әділетті Қазақстанды құру үшін қайтпай күресе білу керек!” – деп жазды заңгер.
Естеріңізде болса, 30 желтоқсан күні Шымкент қаласының тұрғыны кәмілетке толмаған қызының жоғалғаны туралы шағымданғанғанын жазған едік. Іздестіру жұмыстарының нәтижесінде полиция қызметкерлері жоғалған қызды 7 күннен соң, темір жол вокзалынан тапты. Қыздың айтуынша, үйден қашып кетуіне анасының ұрып-соғуы себеп болған.
Алайда Айгүл Орынбектің айтуынша, құзырлы орган қызметкерлері табылған қыздың зорланғанын жасырып қалған. Заңгер аталған оқиғаға байланысты үлкен заңбұзушылық орын алып жатқанын және бұл іске ҚР Бас прокуроры Берік Асыловтың да араласуын сұраған еді.
Сондай-ақ, қыздың анасы қала прокуратурасы екі аптадан бері арызының қарастырылмай жатқанын айтып, Президенттен көмек сұрағанын жазған болатынбыз.