Әзербайжан Ресей қатысатын мәдени шаралардың бәрін тоқтатты

Әзербайжанда Ресеймен жоспарланған барлық ресми және мәдени шаралар тоқтатылды. Бұған Екатеринбург қаласындағы полиция рейдтері кезінде екі әзербайжан азаматының қаза табуы себеп болды, деп хабарлайды Qaz365.kz.

Әзірбайжанның мәлімдеуінше, Ресейдің құқық қорғау органдары әзірбайжан азаматтарына ұлтына байланысты қатыгездік көрсеткен.

2025 жылғы 27 маусымда Ресейдің Екатеринбург қаласында полиция әзербайжан азаматтары тұратын пәтерлерге рейд ұйымдастырып, салдарынан екі адам қаза тауып, бірнешеуі ауыр жарақат алған. Тоғыз адам ұсталған.

Осы оқиғадан кейін Әзербайжан Сыртқы істер министрлігі қатты наразылық білдіріп, Бакудегі Ресей елшілігінің уақытша сенімді өкілін шақыртты. Министрлік оқиғаның толық зерттелуін және кінәлілердің жауапқа тартылуын талап етті.

Ресми мәлімдемені Әзірбайжанның мәдениет министрлігі таратты. Онда бұл шешімнің себебі ретінде «Ресейдің құқық қорғау органдары тарапынан Екатеринбург қаласында әзірбайжан ұлтының өкілдеріне қарсы жасалған демонстративті, мақсатты және сотсыз зорлық-зомбылық пен кісі өлтіру әрекеттері» көрсетілген. Әзірбайжан билігі мұндай жағдайлар жиілеп, үнемі қайталанып бара жатқанын да атап өтті.

Осы жағдайға байланысты:

• Ресей Үкіметі төрағасының орынбасары Алексей Оверчуктың Әзербайжанға сапары (маусым айының соңына жоспарланған) ресми түрде тоқтатылды.
• Әзербайжан Мәдениет министрлігі Ресеймен бірлескен барлық мәдени шараларды, оның ішінде концерттер, көрмелер, театр қойылымдары мен фестивальдерді өткізуден бас тартты.
  Билеттер сатып алған азаматтарға ақшаны қайтарып алу үшін сату орындарына немесе онлайн платформаларға жүгіну ұсынылды.
• Әзербайжан Парламентінің делегациясы Мәскеуде өтеді деп жоспарланған Әзербайжан-Ресей парламенттік комиссиясының 23-отырысына қатыспайтынын жариялады.

Бұл қадамдар Бакудың ресми наразылығының ауқымын және дипломатиялық деңгейдегі салмақты реакцияны көрсетеді.

Сонымен қатар, Әзербайжандағы орыс қауымдастығы ресейлік құқық қорғау органдарының әрекетін айыптап, қылмыспен күрес заң шеңберінде жүргізілуі тиіс екенін және адам өліміне әкелмеуі керек екенін мәлімдеді.

Түрік-әзербайжан достығы қауымдастықтары федерациясының (TADEEF) өкілі Сердар Үнсал бұл рейд тапсырыспен ұйымдастырылған болуы мүмкін екенін айтып, тергеуге халықаралық құқық қорғау ұйымдарының араласуын талап етті.