Қырғыз Республикасының президенті Садыр Жапаров экс-президент Алмазбек Атамбаевты мемлекеттік наградаларынан айыру жөніндегі жарлыққа қол қойды. Бұл ақпарат мемлекет басшысының ресми сайтында жарияланды, деп хабарлайды Qaz365.kz.
Жарлыққа сәйкес, Алмазбек Атамбаев «Қырғыз Республикасының Батыры» жоғары айрықша атағынан, II дәрежелі «Манас» орденінен, «Данакер» ордені мен «Данк» медалінен айырылды.
Сонымен бірге Атамбаевты марапаттауға негіз болған бұрынғы президенттік жарлықтардың күші жойылды. Атап айтқанда, 1999, 2007, 2011 және 2017 жылдары қабылданған құжаттар арқылы берілген барлық мемлекеттік наградалар мен жоғары дәрежелі айрықша атақтар жарамсыз деп танылды.
Құжатта көрсетілгендей, экс-президентке тиесілі марапаттар Қырғыз Республикасының мемлекеттік наградалар қорына өткізілетін болады.