Мемлекеттік кеңесші Ерлан Қарин Конституциялық комиссия отырысында әлеуметтік желілерде айтылған сынға жауап беріп, жаңа Конституция мәтінін әзірлеу жұмысына журналистер мен лингвистердің не үшін тартылғанын түсіндірді, деп хабарлайды Qaz365.kz.
Оның айтуынша, бірнеше айдың ішінде комиссия Конституция мәтінінің қазақ тіліндегі оқылымдылығын айтарлықтай жақсартқан, ал мемлекеттік тілдегі құқықтық терминология іс жүзінде қалыптасқан. Бұл нәтижеге жетуде лингвистер мен журналистердің үлесі зор болған.
Мемлекеттік кеңесші Конституциялық комиссия құрылған кезде оның құрамына тек заңгерлер емес, тіл мамандары мен медиа өкілдерінің енуі қоғамда күмән тудырғанын да атап өтті. Алайда бұл сын нақты атқарылған жұмыстың ауқымын ескермейді деді.
«Конституциялық комиссия құрылғанда “лингвистер мен журналистер онда не істеп жүр?” деген пікірлер айтылды. Бірақ дәл осы мамандар Ата заңның мәтіні сапалы әрі түсінікті болып жазылуына үлкен үлес қосты», – деді Ерлан Қарин.
Ол мемлекеттік тілдің дамуы сапалы, сауатты әрі көпшілікке түсінікті заң мәтіндерінсіз мүмкін емес екенін атап өтті. Осы орайда Қарин Сәкен Сейфуллиннің кеңсе тілі қазақша болмайынша іс алға баспайды деген сөзін еске салды.
Мемлекеттік кеңесшінің айтуынша, қазақ тілінің іс жүргізу саласына енуі ұрандардан емес, заң мәтіндерімен жүйелі әрі нақты жұмыс жүргізуден басталады.
«Мемлекеттік тілдің мәртебесін көтеру күнделікті табанды еңбектен басталады», – деді ол.
Айта кетейік, Конституциялық комиссия Қасым-Жомарт Тоқаевтың 2026 жылғы қаңтардағы жарлығымен құрылды. Комиссия құрамына Парламент депутаттары, мемлекеттік органдардың өкілдері, сарапшылар, ғалымдар, қоғам қайраткерлері және бұқаралық ақпарат құралдарының өкілдері енді. Жаңа Конституция жобасы кейін республикалық референдумға шығарылмақ.