Қазақстан Президенті Қасым-Жомарт Тоқаев республиканың жаңа Конституциясына және оны іске асыру жөніндегі шаралар туралы Жарлыққа ресми түрде қол қойды, деп хабарлайды Qaz365.kz.
Президент бұл оқиғаны ел тарихындағы аса маңызды және мағынасы айрықша қадам деп атады. Жаңа құжатқа сәйкес, Халық Конституциясы 2026 жылдың 1 шілдесінен бастап ресми түрде өз күшіне енетін болды. Сонымен қатар, Мемлекет басшысының шешімімен енді Конституция күні мемлекеттік мереке ретінде жыл сайын референдум өткен күн — 15 наурызда ұлттық деңгейде атап өтіледі.
Қасым-Жомарт Тоқаев Конституция кепілі ретінде бас құжаттағы ережелердің мүлтіксіз орындалуы үшін бар күш-жігерін салатынын жеткізді.
«Жаңа Конституциямызға сәйкес адал қызмет етуге серт беремін», — деді Президент өз сөзінде.
Ол сондай-ақ барша халықты Ата заңның қабылдануымен құттықтап, бұл қадамның ел өмірінде өшпес із қалдыратынын атап өтті.
Жаңа Конституция 2026 жылғы 15 наурызда өткен жалпыхалықтық референдум нәтижесінде қабылданды. Реформалар саяси жүйені жаңғыртуға, мемлекеттік институттарды нығайтуға және азаматтардың құқықтарын қорғау тетіктерін жетілдіруге бағытталған. Бұған дейін Конституция күні 30 тамызда тойланып келген болатын.