Ресей президенті Владимир Путин православиялық Пасха мерекесіне байланысты Украинадағы соғыс қимылдарын уақытша тоқтату туралы шешім қабылдады, деп хабарлайды Qaz365.kz Кремльдің ресми сайтына сілтеме жасап.
Президенттің пәрменіне сәйкес, «пасхалық бітім» 11 сәуір сағат 16:00-ден бастап, 12 сәуірдің соңына дейін күшінде болады.
РФ Қорғаныс министрі мен Бас штаб бастығына барлық бағыт бойынша жауынгерлік іс-қимылдарды тоқтату жүктелді. Дегенмен ресми құжатта ресейлік әскерге қарсы тараптан болатын ықтимал арандатушылықтарға тойтарыс беруге дайын болу бұйырылған. Мәскеу бұл бастамаға Украина тарапы да қолдау білдіреді деп үміттенетінін жеткізді.
Украина президенті Владимир Зеленский бұл шешімге қатысты жауап беріп, Киевтің де осындай қадамдарға дайын екенін мәлімдеді. Ол биыл Украина тарапы Пасха мерекесіне орай оқ атуды тоқтатуды ұсынғанын атап өтіп, халыққа қауіпсіз мереке мен бейбітшілікке бағытталған нақты қадамдар қажет екенін жазды. Зеленский бұл мүмкіндікті соғысты тоқтатудың алғышарты ретінде пайдалануға шақырды.
Бұған дейін, 9 сәуірде Ресей президентінің көмекшісі Владимир Мединский тараптардың қаза тапқан жауынгерлердің денелерімен алмасқанын хабарлаған болатын. Ресей жағы Украинаға 1000 сарбаз бен офицердің денесін өткізіп, өз кезегінде 41 ресейлік әскеридің денесін қабылдап алды.