«Вагнер» ЖӘК негізін қалаушы Евгений Пригожинге қатысты қылмыстық іс тоқтатылатын болды
Ресей Президентінің баспасөз хатшысы Дмитрий Песков «Вагнер» ЖӘК негізін қалаушы Евгений Пригожинге қатысты қылмыстық іс тоқтатылатынын, ал оның «Белоруссияға кететінін» айтты, деп хабарлайды Qaz365.kz.
«Евгений Пригожинге қарсы қарулы көтеріліс туралы қылмыстық іс тоқтатылады, «Вагнер» ЖӘК өзінің далалық лагерьлеріне кетеді, ал Пригожиннің өзі Белоруссияға кетеді деген келісімге қол жеткізілді», - деді Песков.
Беларусь Президенті Александр Лукашенконың баспасөз қызметінің хабарлауынша, Владимир Путин Ресейдің оңтүстігіндегі жағдай туралы ақпарат берді.
«Мемлекет басшылары бірлескен іс-қимылдар туралы уағдаласты. Уағдаластықтарды дамыту үшін Беларусь президенті Ресей президентімен келісе отырып, «Вагнер» ЖӘК басшысы Евгений Пригожинмен келіссөздер жүргізді. Келіссөздер күні бойы жалғасты. Нәтижесінде олар Ресей аумағында қанды қырғынды бастауға жол бермеу туралы келісімдерге келді. Евгений Пригожин Беларусь Президенті Александр Лукашенконың «Вагнер» компаниясының қарулы адамдарының Ресей аумағында қозғалысын тоқтату және шиеленісті ушықтырмау жөніндегі одан әрі қадамдар туралы ұсынысын қабылдады», - делінген хабарламада.
Өз кезегінде Пригожин Мәскеуге 200 шақырым қалған кезде кері қайтқанын мәлімдеді.
«Бір күнде біз біраз жолды жүріп өтіп, Мәскеуге 200 шақырым жетпей тоқтадық. Осы уақыт ішінде біз жауынгерлеріміздің бір тамшы да қанын төккен жоқпыз. Қазір қан төгілуі мүмкін сәт келді. Сондықтан, бір жағынан орыс қаны төгілетінін түсіне отырып, біз жоспарға сәйкес далалық лагерьлерге қарай кері қайтамыз», - деді ол өзінің телеграм-арнасында.