Сондай-ақ министр мемлекеттік тілде баяндама жасай алатынын айтты
Ішкі істер министрінің орынбасары Игорь Лепеха қазақша үйреніп жүргенін, мемлекеттік тілде баяндама жасай алатынын жеткізді, деп хабарлайды Qaz365.kz.
Бүгін Үкімет отырысынан кейін баспасөз мәжілісінде тілшілер «Қазақ тілін білесіз бе? Білмесеңіз, үйрену жоспарда бар ма?» деп сұрады.
«Мен қазақша үйреніп жүрмін. Қазір аздап сөйлеймін. Қызметтік құжаттарды оқи аламын. Баяндама (мемлекеттік тілде) жасай аламын», - деді Игорь Лепеха.
Сонымен қатар ол журналистердің сұрақтарына неліктен орысша жауап беретінін түсіндірді.
«Мен қазір кейбір даулы сұрақтарға қате жауап беріп қаламын ба деп қорқамын. Сіздерді кей жерде дұрыс түсінбей қаламын ба деп немесе бір жерде қате жауап беремін бе деп қауіптенемін. Барлық жиында, кеңесте барынша қазақ тілінде сөйлеуге тырысамын», - дейді министрдің орынбасары.