Депутат Франция Президентімен французша сөйлесті
Франция Президенті Эмманюэль Макрон Қазақстанға жасаған сапарында Ақордадағы ресми кездесуде Мәжіліс депутаты Айгүл Құспанмен аз-кем әңгімелесіп үлгерді. Бұған көпшілік таңданысын білдіріп жатты. Осыған қатысты депутат тілшілерге жауап берді, деп хабарлайды Qaz365.kz.
«Мен француз тілінде өзімді таныстырып, «Қазақстанға қош келдіңіз» дедім. Ол таңғалды. Французша жақсы сөйлейтінімді айтып, қайдан үйренгенімді сұрады. Мен Президент Макронның өзі білім алған Франциядағы белгілі оқу орнын бітіргенімді айттым. Екеуіміз де Францияның ұлттық басқару мектебін тамамдағанбыз. Бұл – кадрлардың ұстаханасы саналатын білім ордасы», – деді Айгүл Құспан.
Қазір еліміздегі шенеуніктердің арасында Президент Қасым-Жомарт Тоқаевты санамағанда француз тілін еркін меңгерген жалғыз Айгүл Құспан екен.
«Макронның адамдарды мұқият тыңдай білетінін оқыдым. Ол біздің делегация мүшелерімен кездескен кезде үлкен қызығушылық танытқанын байқадым. Бұл – саясаттағы талант»,– деді депутат.
Ұлттық басқару мектебі — Франция премьер-министріне бағынатын жоғары оқу орнынан кейінгі білім беру және біліктілікті арттыру саласындағы француз элиталық мемлекеттік мекеме.
Мекемені 1945 жылы генерал Де Голль жоғары мемлекеттік лауазымдарға қол жеткізуді «демократияландыру» үшін құрған.