Ол зардап шеккен азаматтардың бәріне мемлекет қолдау білдірер деп сенетінін жазды
Әнші Димаш Құдайберген су тасқынынан зардап шеккен отандастарын қолдап әлеуметтік желіде жазба қалдырды. Ол зардап шеккен азаматтардың бәріне мемлекет қолдау білдірер деп сенетінін жазды, деп хабарлайды Qaz365.kz.
— Наурыздың соңғы күндері күн күрт жылынып, Ақтөбе облысы аймағында және еліміздің тағы бірқатар өңірлерінде тез еріген қар суы қарқынды түрде сай-саланы толтырып, автокөлік жолдарын шайып, бірнеше елдімекендерді су басыпты. Көптеген отбасылардың баспанасы тұруға жарамсыз болып қалған. Сондай-ақ Ақтөбе аймағында өзендердегі мұз еріп, су қоймаларындағы су деңгейінің көтеріліп, өзендердің арнасынан асу қаупі жоғары екен.
Мұның себеп, салдарын құзырлы мекемелер анықтап, мәселенің түйінін шешу жолдарын іздестіре жатар, — дейді ол.
Әнші мемлекет тарапынан үйлерін су шайып кетіп, далада қалған ағайынға толыққанды көмек көрсетілетініне сенім мол екенін атап өтті.
— Тап қазіргі сәтте қиналғанға қол ұшын созу ең басты парыз.
“От пен су - тілсіз жау” - қысылтаяң сәтте бауырларымызға қол ұшын созып, бірлігімізді көрсетейік, ағайын! — деп жазды Димаш.
Айта кетейік Қазақстанның бірнеше облысының халқы бұл күнде су тасқыны азабымен алысып жатыр. Тұтас ауылдарды, елдімекендерді су басып қалған.