Төрт аудандағы шекарада 42 елдімекен тұр
Абай облысының әкімі Нұрлан Ұранхаев Абай облысында жойылып кеткен елдімекендер жоқ деп мәлімдеді, деп хабарлайды Qaz365.kz.
Астанада брифинг өткізген әкімге Qaz365.kz тілшісі облыстағы шекаралық аумақтарында ауылдық елдімекендердің жай-күйін сұрады. Олардың жойылу қаупін болдырмау үшін қандай нақты шаралар қабылданып жатқаны сауал ретінде қойылды.
«Абай облысында басқа елдермен шекаралас аумақтарда 4 аудан бар. Ол: Мақаншы, Ақсуат, Бесқарағай мен Бородулиха ауданы. Осы аудандардағы шекарада 42 елдімекен тұр. Оларда 35 мыңға жуық адам тұрады. Сондағы халықты жұмыспен қамтып, басқа да жұмыстарын істеп, сол жерден көшіп кетпеуінің жұмысын жүргіземіз», - деп жауап берді әкім.
Нұрлан Ұранхаевтың сөзінше, жойылып кеткен елдімекендер Абай облысында жоқ.
«Біз оларды басқа елдімекендерге қосып, іріктедік», - дейді ол.
1997 жылы 3 мамырда Семей облысы таратылып, аумағы түгелдей Шығыс Қазақстан облысына берілген. 2022 жылы 8 маусымда бұрынғы Семей облысының аумағында Абай облысы құрылды. Құрамына Шығыс Қазақстан облысынан Абай, Аягөз, Бесқарағай, Бородулиха, Жарма, Көкпекті, Үржар аудандары қосылды.