Алматыдағы Абай даңғылын ұзарту жұмыстары: жаңа инфрақұрылым сапасы басты назарда
Алматы қаласында көлік қатынасы мен инфрақұрылымды жақсарту мақсатында Абай даңғылын ұзарту жобасы қарқынды түрде іске асырылуда, деп хабарлайды Qaz365.kz.
Бұл жоба қаладағы көлік қозғалысын жеңілдетіп, жолаушылар үшін қолайлы жағдай жасауға бағытталған.
Абай даңғылын ұзарту жұмыстарының сапасы қатаң бақылауға алынған. Бұл бағыттағы құрылыс процестерін Жол активтерінің ұлттық сапа орталығы Алматы филиалының мамандары қадағалап отыр. Орталық мамандары жолдың беріктігі мен сапасын қамтамасыз ету үшін құрылыс материалдары мен технологияларын жан-жақты тексеруде.
Сапаны бақылау: негізгі әдістер мен шаралар
Жол активтерінің ұлттық сапа орталығы құрылыс жұмыстары барысында
1. Керн сынамаларын алады – асфальтбетон жамылғысының беріктігі мен тығыздығын анықтау үшін сынамалар зертханада тексеріледі.
2. Құрылыс материалдарын талдайды – қолданылатын инертті материалдар (қиыршық тас, құм, битум) және басқа да компоненттердің сапасы стандарттарға сәйкестігі анықталады.
3. Жұмыс технологияларын бақылайды – құрылыс процестерінің бекітілген талаптарға сәйкес орындалуын қамтамасыз етеді.
Жобаның маңызы
Абай даңғылын ұзарту нәтижесінде қала тұрғындары мен қонақтары үшін көлік қозғалысы жеңілдеп, уақыт үнемдеу мүмкіндігі артады. Сонымен қатар, ұзартылған жол учаскесі айналасындағы аудандардың экономикалық дамуына ықпал етеді деп күтілуде. Қалалық мобильдік басқармасы таратқан мәліметке сәйкес жоба құны - 3,5 млрд теңгені құрайды. Жаңа нысанның жұмысын тежеген басты себеп - тұрғын үйлер орналасқан жер учаскелерін сатып алу. Жаңадан салынатын Абай даңғылы бойында 73 тұрғын үй орналасқан. Соның 72-сі сатып алынды.
Жоба аясында тек қана жол салу емес, сондай-ақ, заманауи инженерлік инфрақұрылымдар мен қауіпсіздік жүйелерін орнату жоспарланған. Бұл Алматының заманауи мегаполис ретінде дамуына үлес қосатын маңызды қадамдардың бірі. Әкімдіктің мәліметінше, жобаның аяқталу мерзімі - 2025 жылдың 31 мамырына жоспарланған.