Әйелдер қауымының әлеуметтік, психологиялық және құқықтық мәселелерін шешуге бағытталған Түркістан қаласындағы Отбасы қолдау орталығы өз қызметін белсенді түрде жалғастырып келеді, деп хабарлайды Qaz365.kz.
Мамандардың айтуынша, орталықтарға жүгінетін әйелдердің басты бөлігі отбасылық қарым-қатынасқа байланысты кеңес алады. Жұбайымен түсініспеушілік, ажырасу алдында туындайтын мәселелер, бала тәрбиесіндегі қиындықтар – жиі көтерілетін тақырыптар қатарында. Сонымен бірге, әйелдер тарапынан психологиялық қолдау іздеу де кеңінен байқалады. Эмоциялық күйзеліс, өз-өзіне сенімсіздік, өмірлік мақсаттарды айқындау секілді мәселелер мамандар тарапынан арнайы терапиялық кеңестер арқылы шешілуде.
Орталықтарда әлеуметтік мәселелерге байланысты да көмек көрсетіледі. Атап айтқанда, тұрғын үй кезегіне тұру, мемлекеттік жәрдемақыларды рәсімдеу, жұмысқа орналасу, кәсіпкерлік бағытында кеңес алу сынды сұрақтар жиі қойылады. Бұдан бөлек, әйелдердің құқықтық сауаттылығын арттыруға да басымдық берілген. Мүлікті бөлу, алимент өндіру, бала құқығын қорғау, тұрмыстық зорлық-зомбылықтан қорғау мәселелері бойынша білікті заңгерлер кеңес береді. Сондай-ақ орталықтар әйелдердің жеке тұлғалық дамуына да назар аударады. Арнайы тренингтер мен семинарлар арқылы көшбасшылық қабілеттерін дамытуға, кәсіпкерлікке баулуға, қоғамдық белсенділігін арттыруға жағдай жасалған. Мамандардың пікірінше, мұндай орталықтардың басты мақсаты – қиын жағдайда қалған әйелдерге тек көмек беріп қана қоймай, олардың қоғамдағы белсенділігін арттыруға ықпал ету.
Айта кетейік, гендерлік зорлық-зомбылыққа ведомствоаралық ден қою бойынша Түркістан облысының тәжірибесі Қазақстанның басқа өңірлеріне үлгі ретінде таратылуда. Бұл жүйе 2017 жылдан бастап Түркістан облысында пилоттық режимде енгізілген.