Отбасындағы түсінбеушіліктер – кез келген шаңырақта кездесетін табиғи құбылыс. Алайда, ол мәселелер уақтылы шешілмесе, үлкен жанжалға, тіпті қарым-қатынастың үзілуіне алып келуі мүмкін. Мұндай жағдайда психологтың рөлі өте маңызды. Бұл туралы Түркістан қаласындағы «Отбасын қолдау орталығының» психолог маманы Гүлмира Маралбекқызы баяндады, деп хабарлайды Qaz365.kz.
«Отбасындағы кез келген түсінбеушілікке айыптау емес, түсіністікпен қарау қажет. Екі жақ ортақ шешім табуға ұмтылғанда ғана үйлесім орнайды. Ал қажет болған жағдайда маманға жүгініп, бейтарап көзқарас алу – жанұядағы татулықты сақтаудың тиімді жолдарының бірі. Отбасында жанжалдың болуы – табиғи құбылыс. Алайда, оны ушықтырмай шешу – әр отбасының берекесі үшін маңызды. Мұндай жағдайда ең алдымен эмоцияны бақылап, сабыр сақтаған жөн. Жұбайының пікірін бөлмей тыңдап, өз сезімін «мен» формасында жеткізу – жанжалдың өршуіне жол бермейді. Психолог ең алдымен ерлі-зайыптылардың немесе отбасы мүшелерінің бір-бірін тыңдай алуына және түсіне алуына жағдай жасайды. Көбіне жанжалдың түпкі себебі – дұрыс сөйлесе алмау, эмоцияны жеткізе білмеу. Сондықтан маман жанұяға тиімді коммуникация дағдыларын үйретеді. Сонымен бірге, психолог отбасындағы әр адамның жеке ерекшелігін ескеріп, бейтарап көзқарас білдіреді. Бұл ерлі-зайыптыларға мәселені басқа қырынан көруге мүмкіндік береді. Тағы бір маңызды рөл – эмоциялық қолдау. Әсіресе, әйелдер өз сезімін ашық жеткізгенде, ал ер адамдар өз ойын еркін айта алғанда, көптеген түсінбеушіліктердің түйіні шешіледі»,- дейді маман.
Психологтың негізгі мақсаты – отбасы мүшелеріне дайын шешім беру емес, олардың өзара келісімге келуіне, ортақ шешім табуына бағыт көрсету. Себебі берік отбасылық қарым-қатынас тек өзара түсіністік пен сыйластыққа негізделеді.