Қоғамның тұрақтылығы мен дамуы ең алдымен отбасының берік болуына байланысты. Отбасылық құндылықтарды сақтау тек ата-ана мен бала арасындағы байланыс емес, ұрпақтан-ұрпаққа жалғасатын тәрбие мектебі. Бұл туралы Түркістан қаласындағы «Отбасын қолдау орталығының» психолог маманы Гүлмира Маралбекқызы баяндады, деп хабарлайды Qaz365.kz.
«Бүгінде жаһандану мен заманауи өзгерістер отбасы институтына өз әсерін тигізіп отыр. Дегенмен, дәстүрге негізделген сыйластық, өзара құрмет, жауапкершілік секілді құндылықтар ешқашан өз маңызын жоймайды. Отбасылық құндылықтарды нығайтудың негізгі жолдары – ашық қарым-қатынас орнату, бір-бірін тыңдау, бірге уақыт өткізу және ортақ мақсат қою. Әсіресе, балаларға ата-ананың арасындағы сүйіспеншілік пен татулық үлкен үлгі болады. Қоғамда отбасы құндылығын дәріптеу – әлеуметтік тұрақтылық пен жас ұрпақтың дұрыс қалыптасуына ықпал ететін маңызды қадам. Сондықтан әр отбасы өзара сыйластық пен сенімді сақтап, рухани құндылықтарды ұрпаққа жеткізуге мән беруі тиіс»,- деді маман.
Психологтың сөзінше отбасылық құндылықтар қоғамның негізгі құрамдас бөлігі болып табылады және мәдениет пен адамгершілікті қасиетті қалыптастыруда маңызды рөл атқарады. Құндылықтар отбасы ішіндегі қарым-қатынас пен отбасы мүшелерінің өзара байланысын реттейтін принциптер, сенімдер мен нормалар жиынтығы деуге болады. Отбасы құндылықтарының бірі – жанұядағы адамдардың бір-біріне деген сүйіспеншілігі мен қамқорлығы, махаббаты. Отбасының негізін, шындығында, махаббат сезімі құрайды. Бұл дегеніміз отбасы мүшелерінің бір-біріне көңіл бөлуі, қамқорлық жасауы, қолдау көрсетуі және отбасы мүшесін қандай кемшілігімен болса да қабылдай білу. Махаббат бар жерде өзара үйлесімділік, эмоционалды күшті байланыс, әрі бақытты отбасы болуға деген ұмтылыс болады.