Түркістан қаласында отбасылық құндылықтарды насихаттау мақсатында түрлі мәдени-әлеуметтік іс-шаралар тұрақты түрде ұйымдастырылып келеді. Бұл бастамалардың басты мақсаты – ұлттық құндылықтарды сақтау, отбасы институтын нығайту және әйелдердің қоғамдағы рөлін арттыру, деп хабарлайды Qaz365.kz.
Психолог маман Ақниет Әбдіхалықтың айтуынша, Түркістанда соңғы жылдары отбасын сақтау мен нығайтуға арналған жобалар мен бағдарламалар қарқынды дамып келеді. Алайда, соған қарамастан, тұрмыстық зорлық-зомбылық пен ажырасу деңгейінің артуы қоғамды алаңдатып отыр. Бұл өзекті мәселелерді шешуде тек заңнамалық тетіктермен шектелмей, рухани, мәдени және психологиялық қолдау көрсетудің де маңызы зор.
«Қазіргі кезде отбасындағы келеңсіздіктердің көпшілігі ерлі-зайыптылардың, әсіресе ата-ананың тең жауапкершілігін сезінбеуінен туындайды. Әйелдің қоғамдағы орны ең алдымен отбасындағы жағдайынан басталады. Егер отбасында ананың мейірімі мен әкенің жауапкершілігі үйлесім тапса, мұндай ортада өскен бала өмірге сенімді, жан-жақты тұлға болып қалыптасады», – дейді маман.
Оның пікірінше, әйел адам тек отбасының ғана емес, бүкіл қоғамның тыныштығы мен тұрақтылығына тікелей әсер етеді. Өйткені отбасындағы эмоционалды климат көбінесе ананың психологиялық ахуалына байланысты. Сондықтан әйелдердің әлеуметтік қолдаумен қатар, психологиялық көмекке де қолжетімділігін қамтамасыз ету маңызды. Сонымен қатар, ер адамның отбасылық өмірге белсенді араласуы – әйелдің де, баланың да ішкі үйлесімін сақтауға зор ықпал етеді. Отбасындағы өзара түсіністік пен татулық – ұрпақ тәрбиесінің негізі. Жас отбасылар бұл жауапкершілікті ерте бастан сезінуі тиіс. Бұл бағыттағы түсіндіру жұмыстары мен тәрбиелік жобалар мектеп қабырғасынан бастап енгізілуі қажет.
Ақниет Әбдіхалықтың айтуынша, отбасылық құндылықтарды нығайту – тек мемлекеттік саясаттың емес, бүкіл қоғамның ортақ міндеті. Әйелдің рөлі мен әкенің жауапкершілігі қатар үйлескенде ғана берік, мызғымас отбасы қалыптасады. Бұл өз кезегінде ұлттың болашағы – өскелең ұрпақтың тәрбиесіне, елдің әлеуметтік тұрақтылығына тікелей әсер етеді.